Añarbeko urtegiak 2011tik izan duen ur-erreserba handienarekin hasi du urte hidrologikoa

Urte hidrologiko berria Añarbeko urtegian ur-erreserba handienarekin hasi da 2011. urtetik, ohi baino bigarren seihileko (apirila-iraila) euritsuagoari esker.

Urte hidrologikoan erregistratutako prezipitazioa azken 52 urteetako batez bestekoaren berdina izan bada ere (2.064 l/m2), azken hori modu desberdinean gertatu da: normalean lehen seihilekoan (urria-martxoa) bigarren seihilekoan (apirila-iraila) baino euri gehiago egiten du. Baina azken urte honetan kontrakoa gertatu da: lehenengo seihilekoan 864 l/m2 jaso ziren, eta bigarrenean 1.200 l/m2.

Ondorioz, urtegiaren maila ohi baino altuagoa da egun hauetan. Zehazki, betetze-ehunekoa % 87,1ra igo da, azken hamarkadako batez bestekoa baino hamabi puntu handiagoa.

Urte hidrologikoak prezipitazioen aldakortasuna izan du ezaugarri, azken mende erdiko hilabete lehor eta euritsuenetako batzuk txandakatuz. Hala, maiatza (422 l/m²) eta ekaina (220 l/m²) izan ziren Añarbeko erregistroetako lehen eta hirugarren hilabete euritsuenak, ohi baino euri gehiago egin baitzuten. Hala ere, egoera hori urriko edo otsaileko euri txikiekin konpentsatu da.

Azken finean, ur-hornidura bermatuta dago, Añarbeko arroak Penintsula osoan urteko batez besteko prezipitazio handiena duen eremuetako bat izaten jarraitzen duelako, eta urteko ur-eskaria 24 milioi m³ inguruan egonkortu delako 2013tik, aurreko urteetan eskaria nabarmen jaitsi ondoren hornidura-sareak hobetzeko inbertsioek eraginda.

Prezipitazioak Añarbeko presan (l/m²)